અમિત શાહ આજથી ગુજરાત પ્રવાસે: કરોડોના વિકાસ કાર્યો અને 1 કરોડ વૃક્ષો વાવવાનું મહાઅભિયાન

Written By: વેબદુનિયા ન્યુઝ ટીમ

Published By: કલ્યાણી દેશમુખ

Updated: Sat, 11 Jul 2026 (09:24 IST)

Amit Shah Gujarat Visit

કેન્દ્રીય ગૃહ અને સહકાર મંત્રી અમિત શાહ આજથી ત્રણ દિવસના ગુજરાત પ્રવાસે આવી રહ્યા છે, જ્યાં તેઓ પર્યાવરણ સંરક્ષણ અને વિકાસલક્ષી અનેક મહત્વપૂર્ણ કાર્યક્રમોમાં ભાગ લેશે. આ પ્રવાસ દરમિયાન તેઓ અમદાવાદમાં રાજ્ય સરકારના માર્ગ અને મકાન વિભાગ દ્વારા રૂ.60.68 કરોડના ખર્ચે તૈયાર કરાયેલા 188 આધુનિક સરકારી આવાસોનું ઇ-લોકાર્પણ કરશે. આ ઉપરાંત, 12 જુલાઈના રોજ ગાંધીનગર લોકસભા મતવિસ્તારને વધુ હરિયાળો બનાવવા માટે એક વિશાળ સામૂહિક વૃક્ષારોપણ અભિયાનની શરૂઆત પણ તેમના હસ્તે કરાવવામાં આવશે.

'હરિયાળી લોકસભા' અભિયાન અને 1 કરોડ વૃક્ષોનો લક્ષ્યાંક

'ગાંધીનગર લોકસભા-હરિયાળી લોકસભા'ના સંકલ્પ સાથે શરૂ થનારા આ અભિયાનનો મુખ્ય ઉદ્દેશ્ય લોકોમાં પર્યાવરણ પ્રત્યે જાગૃતિ લાવી વૃક્ષોના જતનને જનઆંદોલન બનાવવાનો છે. વર્ષ 2026-27 દરમિયાન સમગ્ર ગાંધીનગર લોકસભા વિસ્તારની સાતેય વિધાનસભા બેઠકોમાં કુલ 1,01,10,026 વૃક્ષો વાવવાનો મહત્ત્વાકાંક્ષી લક્ષ્યાંક રાખવામાં આવ્યો છે. આ અભિયાન અંતર્ગત સૌથી વધુ અંદાજે 52.64 લાખ વૃક્ષોનું વાવેતર સાણંદ વિસ્તારમાં કરવામાં આવશે, જ્યારે કલોલ અને ગાંધીનગર ઉત્તર જેવા વિસ્તારોમાં પણ લાખો છોડ રોપવામાં આવશે.

ગ્રીન કવરમાં નોંધપાત્ર વધારો અને ઓક્સિજન પાર્કનું નિર્માણ

આ અભિયાન અગાઉના વર્ષોની સફળતાનો જ એક ભાગ છે, કારણ કે વર્ષ 2019થી 2025 દરમિયાન થયેલા સતત પ્રયાસોને લીધે ગાંધીનગર લોકસભા વિસ્તારના ગ્રીન કવરમાં 11.25 ટકાનો મોટો વધારો જોવા મળ્યો છે. શહેરી વિસ્તારોમાં પ્રદૂષણ ઘટાડવા અને હરિયાળી વધારવા માટે અત્યાર સુધીમાં અમદાવાદ અને તેની આસપાસના વિસ્તારોમાં કુલ 94 જેટલા હાઈ-ટેક ઑક્સિજન પાર્ક વિકસાવવામાં આવ્યા છે. આ પરિણામો દર્શાવે છે કે વૈજ્ઞાનિક આયોજન સાથે કરાયેલું વૃક્ષારોપણ પર્યાવરણ માટે ખૂબ જ અસરકારક સાબિત થઈ રહ્યું છે.

મિયાવાકી પદ્ધતિથી અર્બન ફોરેસ્ટ અને જનભાગીદારીની અપીલ

સાબરમતી, ગોતા, થલતેજ, બોડકદેવ, સરખેજ અને વેજલપુર જેવા વિસ્તારોમાં જાપાનની પ્રખ્યાત 'મિયાવાકી પદ્ધતિ' અને ઘનિષ્ઠ વાવેતર ટેક્નિકનો ઉપયોગ કરીને ટૂંકા સમયમાં અર્બન ફોરેસ્ટ (શહેરી જંગલો) તૈયાર કરાયા છે. આ પાર્ક શહેરનું તાપમાન ઘટાડવામાં અને હવાની ગુણવત્તા સુધારવામાં મદદ કરે છે. આ અભિયાનમાં સામાન્ય નાગરિકો સરળતાથી જોડાઈ શકે તે માટે ઓનલાઈન રજીસ્ટ્રેશનની વ્યવસ્થા કરવામાં આવી છે અને સરકાર દ્વારા દરેક પરિવારને માત્ર વૃક્ષ વાવવાનું જ નહીં, પણ તેના ઉછેરની જવાબદારી લેવા પણ અપીલ કરાઈ છે.

કર્મચારીઓ માટે રૂ.60.68 કરોડના ખર્ચે આધુનિક સરકારી આવાસો

ગૃહમંત્રી અમિત શાહના હસ્તે જે સરકારી આવાસોનું લોકાર્પણ થવાનું છે, તે રૂ.60.68 કરોડના ખર્ચે ચાર મલ્ટીસ્ટોરી ટાવરોમાં તૈયાર કરવામાં આવ્યા છે. આ આધુનિક આવાસોનો સીધો લાભ વર્ગ-1, વર્ગ-2 અને વર્ગ-3ના સરકારી અધિકારીઓ તથા કર્મચારીઓને મળશે. આ પ્રોજેક્ટ હેઠળ શાહીબાગ, એલ.ડી.સી.ઈ. સુંદરમ કોલોની અને ફોટોલીથો પ્રેસ કોલોની જેવા વિસ્તારોમાં અલગ-અલગ કેટેગરીના (E, D-1, C, B) મકાનો બનાવાયા છે, જેમાં મોર્ડન ડ્રોઇંગ રૂમ, ડાઇનિંગ એરિયા, માસ્ટર બેડરૂમ, ઓફિસ રૂમ, બગીચા અને પાર્કિંગ જેવી તમામ જરૂરી સુવિધાઓ ઉપલબ્ધ છે.