ઓછા તેલમાં બનાવો ક્રિસ્પી ફરાળી સાબુદાણા-બટાકાની ટિક્કી, નવરાત્રિ ઉપવાસ માટે બેસ્ટ
નવરાત્રિ દરમિયાન ઉપવાસમાં કંઈક સ્વાદિષ્ટ અને ચટપટું ખાવાનું મન થાય તો ઓછા તેલમાં બનતી સાબુદાણા-બટાકાની ક્રિસ્પી ટિક્કી એક ઉત્તમ વિકલ્પ છે. સાબુદાણા, બટાકા અને શેકેલા સીંગદાણાના ભૂકામાંથી બનતી આ ટિક્કી બહારથી કરકરી અને અંદરથી નરમ બને છે. તેને તમે નોન-સ્ટિક તવા પર અથવા અપ્પે પાત્રમાં પણ બનાવી શકો છો. તો ચાલો જાણીએ નવરાત્રિના ઉપવાસ માટે આ સરળ અને સ્વાદિષ્ટ ફરાળી રેસિપી.
સાબુદાણા-બટાકાની ટિક્કી બનાવવા માટેની સામગ્રી
પલાળેલા સાબુદાણા – 1 કપ
બાફેલા બટાકા – 2થી 3 (મેશ કરેલા)
શેકેલા સીંગદાણાનો ભૂકો – 3થી 4 ચમચી
લીલાં મરચાં – 2થી 3 (બારીક સમારેલાં અથવા વાટેલાં)
જીરું – 1 નાની ચમચી
શિંગોડાનો લોટ અથવા રાજગરાનો લોટ – 2 ચમચી
સિંધવ મીઠું – સ્વાદ અનુસાર
બારીક સમારેલી કોથમીર – જરૂરિયાત મુજબ (ઉપવાસમાં ખાતા હો તો)
તેલ અથવા ઘી – જરૂરિયાત મુજબ
સાબુદાણા-બટાકાની ટિક્કી બનાવવાની રીત
સ્ટેપ 1: મિશ્રણ તૈયાર કરો
સૌપ્રથમ એક મોટા બાઉલમાં પલાળેલા સાબુદાણા, બાફેલા બટાકા, શેકેલા સીંગદાણાનો ભૂકો, લીલાં મરચાં, જીરું, સિંધવ મીઠું અને શિંગોડાનો અથવા રાજગરાનો લોટ ઉમેરો. બધી સામગ્રીને સારી રીતે મિક્સ કરીને નરમ અને બાંધી શકાય તેવું મિશ્રણ તૈયાર કરો.
સ્ટેપ 2: ટિક્કીનો આકાર આપો
હાથ પર થોડું તેલ અથવા ઘી લગાવો. ત્યારબાદ મિશ્રણમાંથી નાના ગોળા બનાવીને તેને હથેળીથી દબાવી ટિક્કીનો આકાર આપો. આ રીતે બધી ટિક્કી તૈયાર કરી લો.
સ્ટેપ 3: તવા પર ઓછી તેલમાં શેકો
નોન-સ્ટિક તવાને ગરમ કરો અને તેના પર 1થી 2 ચમચી તેલ અથવા ઘી લગાવો. હવે ટિક્કીને તવા પર ગોઠવીને ધીમા અથવા મધ્યમ તાપે 3થી 4 મિનિટ સુધી શેકો. એક બાજુ સોનેરી અને કરકરી થઈ જાય એટલે ટિક્કીને પલટાવો. બીજી બાજુ પણ જરૂર મુજબ થોડું તેલ લગાવીને ક્રિસ્પી થાય ત્યાં સુધી શેકો.
સ્ટેપ 4: અપ્પે પાત્રમાં બનાવવાની રીત
જો તમે વધુ ઓછા તેલમાં ટિક્કી બનાવવા માંગતા હો, તો અપ્પે પાત્રનો ઉપયોગ કરી શકો છો. પાત્રની દરેક ખાંચમાં તેલનાં 2થી 3 ટીપાં નાખો. તૈયાર મિશ્રણમાંથી નાના ગોળા બનાવીને ખાંચમાં મૂકો અને ઢાંકણ ઢાંકી ધીમા તાપે 2થી 3 મિનિટ સુધી પકાવો. ત્યારબાદ તેને પલટાવીને બીજી બાજુ પણ સોનેરી અને કરકરી થાય ત્યાં સુધી શેકો.
સાબુદાણા-બટાકાની ટિક્કી કેવી રીતે સર્વ કરવી?
ગરમાગરમ ક્રિસ્પી સાબુદાણા-બટાકાની ટિક્કીને ફરાળી દહીં, કોથમીર-લીલા મરચાંની ચટણી અથવા નારિયેળની ચટણી સાથે સર્વ કરો. નવરાત્રિના ઉપવાસ દરમિયાન સાંજની ભૂખ સંતોષવા માટે આ સ્વાદિષ્ટ નાસ્તો ઉત્તમ છે.
ખાસ ટિપ્સ:
સાબુદાણા પલાળ્યા પછી તેમાં વધારે પાણી ન રહે તેનું ધ્યાન રાખો.
ટિક્કીનું મિશ્રણ ઢીલું લાગે તો થોડો શિંગોડાનો અથવા રાજગરાનો લોટ ઉમેરો.
ટિક્કીને મધ્યમ તાપે ધીમે ધીમે શેકવાથી તે બહારથી કરકરી અને અંદરથી સારી રીતે પાકેલી બનશે.
ઉપવાસમાં વપરાતી સામગ્રી અને મસાલા તમારી પરંપરા મુજબ પસંદ કરો
