બચેલી રોટલીમાંથી બનાવો ક્રિસ્પી રોટલી કટલેટ
સામગ્રી
3-4 રોટલી
2 બાફેલા બટાકા
1 નાની ડુંગળી, ઝીણી સમારેલી
1 લીલું મરચું, ઝીણું સમારેલું
2 ટેબલસ્પૂન કોથમીર, ઝીણી સમારેલી
½ ટીસ્પૂન લાલ મરચું પાવડર
½ ટીસ્પૂન ગરમ મસાલો
½ ટીસ્પૂન ચાટ મસાલો
½ ટીસ્પૂન જીરું પાવડર
2 ટેબલસ્પૂન કોર્નફ્લોર અથવા ચોખાનો લોટ
સ્વાદ મુજબ મીઠું
જરૂર મુજબ તેલ
બનાવવાની રીત
સૌ પ્રથમ બચેલી રોટલીને નાના ટુકડામાં તોડી લો. તેને મિક્સરમાં નાખીને બારીક ક્રશ કરી લો. હવે એક વાસણમાં ક્રશ કરેલી રોટલી લો અને તેમાં બાફેલા બટાકા મેશ કરીને ઉમેરો.
ત્યારબાદ તેમાં ઝીણી સમારેલી ડુંગળી, લીલું મરચું અને કોથમીર ઉમેરો. તેમાં લાલ મરચું પાવડર, ગરમ મસાલો, ચાટ મસાલો, જીરું પાવડર અને સ્વાદ મુજબ મીઠું નાખો.
હવે તેમાં કોર્નફ્લોર અથવા ચોખાનો લોટ ઉમેરો અને બધી સામગ્રીને સારી રીતે મિક્સ કરીને મિશ્રણ તૈયાર કરો. મિશ્રણમાંથી નાના-નાના ભાગ લઈ ગોળ અથવા ચપટા કટલેટનો આકાર આપી લો.
કડાઈમાં થોડું તેલ ગરમ કરો. કટલેટને મધ્યમ તાપે બંને બાજુથી સોનેરી અને ક્રિસ્પી થાય ત્યાં સુધી શેકી લો. તમે ઈચ્છો તો તેને ઓછા તેલમાં શેલો ફ્રાય અથવા એર ફ્રાય પણ કરી શકો છો.
તૈયાર ગરમાગરમ રોટલી કટલેટને લીલી ચટણી, ટામેટાની ચટણી અથવા દહીં સાથે સર્વ કરો. આ રીતે રાત્રે બચેલી રોટલીનો સ્વાદિષ્ટ રીતે ઉપયોગ કરીને સવારનો નાસ્તો તૈયાર કરી શકાય છે
