IND vs ENG: વિરાટ કોહલી સહિત આ પાંચ ખેલાડીઓએ બાજી બગાડી, ભારતને ઈગ્લેંડ સામે મળી શરમજનક હાર

ભારત અને ઈંગ્લેન્ડ વચ્ચેની પાંચમી અને છેલ્લી ટેસ્ટ મેચ યજમાન ટીમે સાત વિકેટે જીતી લીધી છે. એજબેસ્ટન ખાતે રમાયેલી શ્રેણીની છેલ્લી મેચને  ઈંગ્લેન્ડે 378 રનનો જીત માટે ટાર્ગેટ મેળવીને પોતાને નામે કર્યો. ગયા વર્ષે શરૂ થયેલી પાંચ મેચની ટેસ્ટ શ્રેણી 2-2ના ડ્રો સાથે સમાપ્ત થઈ.

એજબેસ્ટન ટેસ્ટ પહેલા ભારત 2-1થી આગળ હતું અને તેમની પાસે સિરીઝ જીતીને ઈતિહાસ રચવાની તક હતી. પરંતુ ભારતીય ટીમ મજબૂત લીડ હોવા છતાં મેચ હારી ગઈ હતી. ભારતના પાંચ ખેલાડીઓ હતા, જેમણે આ મેચમાં નહિવત યોગદાન આપ્યું હતું. ચાલો જાણીએ એ પાંચ ખેલાડીઓ વિશે, જેના કારણે ટીમ ઈન્ડિયાને કારમી હારનો સામનો કરવો પડ્યો હતો.

વિરાટ કોહલી:

પૂર્વ કેપ્ટન વિરાટ કોહલીએ ફરી એકવાર બેટથી નિરાશ કર્યા છે. તેમનું ખરાબ ફોર્મ અહીં પણ ચાલુ રહ્યું અને તેઓ  બંને ઇનિંગ્સમાં માત્ર 31 રન જ બનાવી શક્યા. તેમણે પ્રથમ દાવમાં 11 રન અને બીજા દાવમાં માત્ર 20 રન બનાવ્યા હતા. વિરાટે મેચ દરમિયાન ઘણા મહત્વપૂર્ણ કેચ પણ છોડ્યા હતા.

શુભમન ગિલ:

કેએલ રાહુલની ગેરહાજરીમાં આ મેચમાં શુભમન ગિલને તક આપવામાં આવી હતી અને તેમણે  ઇનિંગ્સની શરૂઆતની જવાબદારી સોંપવામાં આવી હતી. ઓસ્ટ્રેલિયાની જીતમાં મહત્વની ભૂમિકા ભજવનાર ગિલ આ મેચમાં સંપૂર્ણ રીતે નિષ્ફળ રહ્યો હતો. તેણે બંને દાવમાં માત્ર 21 રન (17+4)નું યોગદાન આપ્યું હતું. તે સંપૂર્ણ રીતે લડતો જોવા મળ્યો હતો

શ્રેયસ અય્યર:

રોહિત શર્મા કોરોનાને કારણે મેચમાંથી બહાર થયા બાદ શ્રેયસ અય્યરને મિડલ ઓર્ડરમાં રમવાની તક મળી હતી. પરંતુ તેણે આ તકનો લાભ લીધો ન હતો. શ્રેયસે બંને ઇનિંગ્સમાં માત્ર 34 રન (15+19) બનાવ્યા. જ્યારે ટીમને તેની પાસેથી ભાગીદારી અને મોટી ઇનિંગ્સની અપેક્ષા હતી, તે સમયે તેણે ખરાબ શોટ રમીને પોતાની વિકેટ ગુમાવી દીધી હતી.

હનુમા વિહારી:

હનુમા વિહારી આ મેચમાં યોગદાન આપી શક્યો નહોતો. છેલ્લા કેટલાક સમયથી ખરાબ ફોર્મમાંથી પસાર થવા છતાં તેને આ મેચમાં તક મળી હતી, પરંતુ તેણે ફરીથી નિરાશ કર્યો હતો. વિહારીને ત્રીજા નંબર પર બેટિંગ કરવા મોકલવામાં આવ્યો હતો પરંતુ તે મેચમાં માત્ર 31 રન (20+11) જ બનાવી શક્યો હતો. તેણે ઈંગ્લેન્ડની બીજી ઈનિંગમાં 18 રન પર જોની બેરસ્ટોનો સરળ કેચ પણ ડ્રોપ કર્યો હતો.

શાર્દુલ ઠાકુર:

ગયા વર્ષે ઈંગ્લેન્ડ સામે તેના ઓલરાઉન્ડ પ્રદર્શનને કારણે આ વખતે ઉમેશ યાદવ અને અશ્વિન જેવા ખેલાડીઓ કરતાં શાર્દુલને પસંદ કરવામાં આવ્યો હતો. પરંતુ આ મેચમાં શાર્દુલ સંપૂર્ણપણે નિષ્ફળ રહ્યો હતો અને ટીમ માટે બોજ સાબિત થયો હતો. જ્યારે તેણે બેટિંગમાં માત્ર પાંચ રન (1+4) બનાવ્યા, ત્યારે તે બોલિંગમાં પણ ફ્લોપ રહ્યો. પ્રથમ દાવમાં શાર્દુલે સાત ઓવરમાં 48 રન આપીને એક વિકેટ લીધી હતી, જ્યારે બીજી ઈનિંગમાં તેણે આઠ ઓવરમાં કોઈ વિકેટ વિના 35 રન આપ્યા હતા.