5g Spectrum Auction દ્વારા મળ્યા રેકોર્ડ 1.5 લાખ કરોડ રૂપિયા, બોલી લગાવવામાં જિયો સૌથી આગળ રહી

1 ઓગસ્ટ  ભારતમાં અત્યાર સુધીની સૌથી મોટી સ્પેક્ટ્રમની હરાજી સોમવારે સમાપ્ત થઈ. સાત દિવસની હરાજીમાં રૂ. 1.5 લાખ કરોડથી વધુ મૂલ્યના 5G ટેલિકોમ સ્પેક્ટ્રમનું રેકોર્ડ વેચાણ થયું હતું. આ હરાજીમાં અબજોપતિ ઉદ્યોગપતિ મુકેશ અંબાણીની કંપની Jio એ પોતાની અગ્રણી સ્થિતિ મજબૂત કરવા માટે સૌથી વધુ બોલી લગાવી હતી.

આ મામલાની જાણકારી રાખનારા સૂત્રોએ જણાવ્યું હતું કે કામચલાઉ આંકડાઓ મુજબ, કુલ રૂ. 1,50,173 કરોડની બિડ મૂકવામાં આવી હતી.

અત્યંત હાઈ-સ્પીડ મોબાઈલ ઈન્ટરનેટ કનેક્ટિવિટી ઓફર કરવામાં સક્ષમ 5G સ્પેક્ટ્રમની આ હરાજી રકમ ગયા વર્ષે વેચવામાં આવેલા રૂ. 77,815 કરોડના 4G સ્પેક્ટ્રમ કરતાં લગભગ બમણી છે. આ રકમ 2010માં 3G હરાજીમાંથી મળેલા રૂ. 50,968.37 કરોડની સરખામણીએ ત્રણ ગણી છે.

Reliance Jio એ 4G કરતા લગભગ 10 ગણી ઝડપી કનેક્ટિવિટી ઓફર કરતી રેડિયો તરંગો માટે સૌથી વધુ બોલી લગાવી હતી.

તે પછી ભારતી એરટેલ અને વોડાફોન આઈડિયા લિમિટેડનો નંબર આવે છે.

અદાણી જૂથે ખાનગી ટેલિકોમ નેટવર્ક સ્થાપવા માટે 26 મેગાહર્ટજ સ્પેક્ટ્રમ ખરીદ્યું હોવાનું કહેવાય છે.

સૂત્રોએ જણાવ્યું હતું કે કઈ કંપનીએ સ્પેક્ટ્રમ ખરીદ્યું તેની વિગતો હરાજીનો સંપૂર્ણ ડેટા બહાર આવ્યા પછી જ જાણી શકાશે.

સરકારે 10 બેન્ડમાં સ્પેક્ટ્રમ ઓફર કર્યું હતું, પરંતુ 600 મેગાહર્ટજ, 800 મેગાહર્ટજ અને 2300 મેગાહર્ટજ બેન્ડમાં સ્પેક્ટ્રમ માટે કોઈ બિડ પ્રાપ્ત થઈ ન હતી.

લગભગ બે તૃતીયાંશ બિડ 5G બેન્ડ (3300 મેગાહર્ટજ અને 26 GHz) માટે હતી, જ્યારે એક ચતુર્થાંશથી વધુ માંગ 700 મેગાહર્ટજ બેન્ડમાં આવી હતી. બેન્ડ છેલ્લી બે હરાજી (2016 અને 2021)માં વેચાયું ન હતું.

ગયા વર્ષે યોજાયેલી હરાજીમાં, રિલાયન્સ જિયોએ રૂ. 57,122.65 કરોડનું સ્પેક્ટ્રમ લીધું હતું. ભારતી એરટેલે આશરે રૂ. 18,699 કરોડની બિડ કરી હતી અને વોડાફોન આઇડિયાએ રૂ. 1,993.40 કરોડમાં સ્પેક્ટ્રમ ખરીદ્યું હતું.